Sfida e një radioje për 40 mijë banorë

Sot rinisim këtë edicion të emisionit "Si të bëhesh milioner". Është një ngjarje e kënaqshme dhe interesante për mua. Sigurisht që e kemi vonuar pak. Do ishte më mirë të fillonim më herët, në fund të shtatorit ose në fillim të tetorit. I kam bërë një çikë bisht. Sa herë që ne nuk përmbushim diçka e kemi një përgjigje: Kam pasur shumë punë, shumë-shumë punë! Sipërmarrësit e menaxherët, kur nuk përmbushin ndonjë detyrim ndaj miqve, shokëve, kolegëve; kur nuk shkojnë për ndonjë festë, sebep, sëmundje, ngushëllim apo për ndonjë gjë tjetër; kur s'janë korrektë me gratë, kur nuk përmbushin ndonjë detyrim kontraktual, e kanë në majë të gjuhës justifikimin: Kam pasur shumë punë, më falni, o Zot, jam e mbytur në punë! Shpresoj që të bëjmë një bashkëbisedim përfitues, të mësojmë ndonjë mendim të vogël, të ekzaltojmë ndonjë ide.

Pyetja: Jam shumë afër që të vendos pajisjet për një radiostacion. Lokacioni ku mendoj të zhvilloj veprimtarinë është vendlindja ime, një komunë me 40 000 banorë. Momentalisht këtu funksionon vetëm një radiostacion, që është pronë komunale dhe nuk ka asnjë televizion lokal. Pyetja ime është: Si mund të jem i suksesshëm në fushën e mediave elektronike? Më saktë, a mund të jetë lëmi fitimprurës dhe si?

Arbeni, 23-vjeç

Përgjigjja: Dëshira për të fituar është një nga karakteristikat e brezit Y*. Karakteristika më përfaqësuese për brezin Y është sensi ose shpirti i sipërmarrjes. Djem dhe vajza të rinj dhe shumë të rinj, projektojnë sipërmarrje në fusha të ndryshme. Të besh një radio në një komunë me 40 mijë banorë nuk është e pamundur. Një radio në një komunë me 40 mijë banorë në Kosove ose Maqedoni, nuk besoj se do të bëjë një biznes shumëmilionësh, por mund të jetë një biznes që e përligj veten, që e kthen investimin. Përveç kësaj, radio është një medie shumë e "fisme", prodhon vlera humane, ndihmon njerëzit, i shërben komunitetit. Them se është një sfidë interesante dhe duke qenë se ju jeni duke e çuar deri në fund këtë sipërmarrje s'më mbetet veçse të pres lajmin, që ju ia keni dalë të jeni eficient. Zhvillimet e teknologjisë sot janë të tilla, që lejojnë pjesëmarrjen e gjerë të publikut në bërjen e vete radiostacionit, pjesëmarrjen e tij në prodhimin e informatave, programeve, shërbimeve etj. Njerëzit kanë nevojë dhe dëshirën për të komunikuar mesazhe, urime, infobiznes, njoftime mbi aktivitetin, lajme për punën, për shkollimin, për shëndetin, për të gjitha historitë e jetës në komunë. Kjo do të mundësonte kosto të ulëta të prodhimit të informacionit, si dhe një dëgjueshmëri të lartë. Mos harroni se një media komunale nuk duhet të mbështetet mbi rrogëtarë, por mbi vullnetarë.

Faleminderit!