A NA DUHET SERISH NJE I HUAJ PER KOMBETAREN?

Pyetje

Jam tifoz i Kombëtares. Dorëheqja e Bariç m'u duk e domosdoshme por më shqetëson fakti që kemi ndërruar dhe po ndërrojmë shumë trajnerë të huaj. Përse? Ne i përzëmë ata apo ata nuk përshtaten dot me gjithçka tonën?

Edhe Brigeli, edhe trajneri i tanishëm Oto Bariç kanë zhvilluar normalisht përgjegjësitë e tyre. Nuk duhet të shqetësohemi se pse një trajner largohet n.q.s ai bën rezultate zhgënjyese ose përfundon një marrëveshje. Ne duhet të vazhdojmë të marrim trajnerë të huaj për Kombëtaren e Shqipërisë, njerëz që kanë reputacion në tregun e specialistëve të futbollit, që kanë nivel, sjellje dhe kulturë tjetër, si në trajnim, ashtu edhe në menaxhim. Posti i trajnerit të Kombëtares së Shqipërisë nuk mund t'ju jepet trajnerëve shqiptarë. Kombëtarja jonë nën drejtimin e Brigelit dhe të Bariçit ka qenë mbi nivelin e futbollit shqiptar, mbi kapacitetet tona të tanishme. Kjo tregon se ata kanë sjellë me të vërtetë maksimizim të rezultateve tona. Nuk është as e shpjegueshme, as e mirë që Bariç 75-vjeçar të bëjë sjellje të atilla, që ta dënojnë të ndjekë ndeshjet e skuadrës sonë nga shkallët e stadiumeve! Kjo do të thotë se ai i la praktikisht pa i drejtuar ndeshjet e fundit. Por më i pashpjegueshëm është zelli i disa politikanëve që s'kanë pikë lidhje me futbollin shqiptar, për të zbuluar grupe mafioze në drejtimin e Kombëtares e për të sulmuar Presidentin e FSHF-së, për shkak të dy humbjeve të fundit të skuadrës tonë.

Faleminderit!