"Administrata publike dhe biznesi privat"

PYETJE: Kam mbaruar përpara 8-vjetësh për Shkenca Politike dhe kam punuar që në fillim në administratën publike. Kam bërë shumë trajnime dhe të them të drejtën më ka pëlqyer e gjithë kjo eksperiencë. Me ndryshimin e partive e shoh të vështirë të vazhdoj, kështu që mendoj të punoj në sektorin privat. Ju, si mendoni?

Ju mendoni të bëni një ndryshim kolosal, aq të fuqishëm, aq të madh. Është si të ikësh nga Selenica dhe të shkosh në Paris në këmbë. Kemi gjithë këto vite që intervistojmë persona që vijnë nga administrata publike, që të punojnë në kompanitë tona. Ne kemi bërë shumë prova. Rezultatin mund ta them. Të gjithë aplikantët që kemi punësuar nga ndërmarrjet ose nga administrata shtetërore në kompanitë tona, kanë rezultuar të dështuar. Pas pak kohësh ata janë pushuar nga puna. Ne jemi plotësisht paragjykues, për çdo kandidat që vjen nga administrata publike. Diferenca kulturore e njerëzve që punojnë në administratën publike, me njerëzit që punojnë në kompanitë private, është shumë e madhe. Një person që punon disa vite në administratën publike sapo mbaron shkollën, si puna juaj, e ka pothuajse zero shansin që të jetë i suksesshëm në kompanitë private. Ju mund të jeni një përjashtim i rrallë dhe mund të bëni sukses, por në përgjithësi nuk ndodh kështu. Në administratën publike nuk ka performancë, nuk zhvillohet konkurrencë e brendshme, nuk zhvillohet kultura e marrjes së përgjegjësive, nuk ekzistojnë sistemet e vlerësimit e të ndarjes së privilegjeve dhe lavdërimeve mbi bazën e sjelljes dhe rezultateve. Mirëpo këto elementë janë vendimtarë në kompanitë private. Në administratën publike, skemat e funksionimit mbështeten mbi parime të tjera. Të punosh tetë vjetët e para në administratën publike dhe të rrezikosh të shkosh në kompanitë private, duhet vërtet një guxim i madh. Është ndryshe me personat të cilët kanë punuar më parë dhe janë edukuar me kulturën e kompanive private. Këta mund të shkojnë pastaj të bëjnë karrierë në politikë, në qeverisje ose në administratën publike dhe të kuptojnë mënyrën se si funksionon atje. Personat që kanë bërë karrierë në kompanitë private dhe pastaj shkojnë në burokracinë publike, përfitojnë njohuri të tjera, mbi bazën e të cilave mund të rrisin aftësinë e tyre për të qenë më të efektshëm në biznesin privat.

Faleminderit!