"Ç'të ardhme ka Vlora, me projektet për TEC-e dhe rafineri"

Pyetje: Jam vlonjat që jetoj në Tiranë. Ç'të ardhme ka Vlora dhe meqenëse kemi atje apartamente dhe dyqane, ç'duhet të presim? Gjithë këto projekte për TEC-e e rafineri na kanë shqetësuar shumë. Ju lutem, si mendoni.

TEC-et dhe rafineritë kanë impakt të madh në mjedis, në jetën dhe shëndetin e njerëzve dhe në rivlerësimin e pasurive. Këto ndikime nuk ndodhin brenda natës. Ndryshimet do të ndodhin në vite, me kohë dhe gradualisht, dhe nuk është e thjeshtë që të parashikosh se si do t'i zhvillojë koha çmimet e banesave. Dëshiroj të besoj se këto projekte nuk do të zhvillohen. Ato kanë fituar terren deri tani, por i lutem Zotit të fillojë koha e keqe për to. Këto projekte nuk dëmtojnë vetëm "Vlorën e vlonjateve". Të mbrosh Vlorën nga projektet me bazë nafte, të cilat janë shkatërruese për mjedisin, nuk është një punë vetëm e Vlonjatëve. S'mund të tregohemi ne dorëlëshuar e të papërgjegjshëm në trajtimin e pasurive tona kombëtare. Ne jemi një vend i varfër dhe duhet t'i çmojmë shumë gjërat që kemi. Mjedisi është nga të paktat pasuri që na ka mbetur ne shqiptarëve. Të gjithë qytetarët e Shqipërisë duhet të ndihen të dëmtuar nga humbja e shanseve të zhvillimit të rajonit të Vlorës. Edhe sikur këto projekte të zhvillohen, nuk ka gjasa që në një afat të shkurtër, të ndikojnë në rënien e çmimeve të apartamenteve dhe dyqaneve.

Faleminderit!