"Garanci" që duan të qetësojnë mbrojtësit e Vlorës"

PYETJE - Dëgjova deklaratën e qeverisë se TEC-i që u miratua me rastin e vizitës së Prodit do bëhet në bregdet, por jo në Vlore. Si mendoni ju?

Ne nuk i besojmë vlefshmërisë së deklaratave të qeveritarëve për të ardhmen. Gjithçka thuhet për Vlorën, se atje nuk do të ndërtohet Park Energjetik, nuk do të ndërtohet TEC me qymyr, TEC me naftë etj., kanë lidhje me të ardhmen. Këto "garanci" duan të qetësojnë luftëtarët për mbrojtjen e Gjirit të Vlorës, me qëllim që ata të mos kundërshtojnë Petroliferën dhe TEC-in që po ndërtohet tani. Mirëpo vetëm këto mjaftojnë për ta shkatërruar të ardhmen turistike të Gjirit të Vlorës. Pas kësaj nuk do ketë më arsye të qenësishme për të rezistuar dhe atëherë gjëja më e lehtë është të shtosh edhe një TEC, të shtosh edhe një tjetër, ta ndërrosh këtë të fundit nga TEC me qymyr në TEC me naftë etj. N.q.s., në Vlorë do ndërtohet Petrolifera dhe ky TEC që ka nisur, atje do ndërtohen gjithë TEC-et dhe rafineritë që janë "kundërshtuar" e "hedhur poshtë" nga Qeveria e Shqipërisë, atje do të ndërtohet edhe TEC-i me qymyr që qeveria e ka destinuar për në një "zonë tjetër" të bregdetit shqiptar. Me sa duket e fatkeqësisht, kjo po ndodh. Udhëheqësit e rezistencës qytetare janë të përçarë, të paqartë, merren me folklorizma, në vend që të udhëheqin rininë në aksion dhe t'i ndalojnë të ndërtohen këto vepra derisa të jetë kryer referendumi dhe të jetë marre pëlqimi i komunitetit.