"Të bëhesh i suksesshëm në kushte normale"

PYETJE NË EMISIONIN "SI TË BËHEHS MILIONER" - Z.Kokëdhima, a mendoni edhe ju që ndryshimi i sistemit, rënia apo luhatja, rënia ekonomike janë momente të duhura për të startuar një biznes dhe për t'u pasuruar? Po një mbështetje fillestare ekonomike, sa ndikon në një pasurim të shpejtë? Doja t'ju pyesja edhe për mbështetjen politike, ndikimin e saj, pasi në një emision dëgjova të debatohej për këtë argument. Faleminderit!

PËRGJIGJE NGA KOKËDHIMA - Mendoj që ndryshimi i sistemit apo krizat, nuk janë të domosdoshme si kushte pasurimi. Periudhat e ndryshimit të sistemit apo periudhat e krizave, mund të them se janë okazione të mira për të bërë biznes. Krizat nga njëra anë prodhojnë drama, prodhojnë humbje për ata që nuk i menaxhojnë mirë situatat në bizneset e tyre, por nga ana tjetër krijojnë shanse për përfitime. Kështu që shfrytëzimi i momenteve, i luhatjeve dhe i krizave për të bërë fitime me ritme më të larta sesa normalet, është një fakt i njohur historik.

Por, i dashur Kastriot, të bëhesh i suksesshëm në kushte normale është një mundësi që ekziston gjithë kohën. Njeriu duhet të jetë i përgatitur të bëjë sukses pa pasur nevojë për kriza apo për prishje të ekuilibrave ekonomikë e shoqërorë.

Edhe kushti që të kesh një suport fillestar ekonomik, mendoj se nuk është i domosdoshëm. Sigurisht që është mirë ta kesh, por nuk është një gjë e domosdoshme për t'u pasuruar. E domosdoshme është që të kesh një ide të mirë, aftësi që varen nga ti dhe pune. Mbështetja financiare në përgjithësi është në mundësitë e infrastrukturës financiare të një vendi. Është përgjegjësi e tregut bankar dhe tregut të kapitaleve, që të financojë idetë e drejta dhe menaxhimin e mirë të tyre.

Sa për mbështetjen politike, ashtu siç e kam thënë dhe në një përgjigje të mëparshme, ti mund ta përdorësh atë mbështetje politike, por duhet të kesh kujdes. Ajo që sot është një mbështetje politike, nesër mund të jetë një faktor kundër teje dhe atëherë ti do të gjesh mbrojtje te ligji. Është shumë mirë, që mbështetjen politike ta shfrytëzosh për të zhvilluar biznesin tënd, por gjithmonë në përputhje të plotë me ligjin.