Maqedoni, zgjedhjet shpallen të përfunduara

Komisioni Shtetëror Zgjedhor (KSHZ) i shpalli të përfunduara zgjedhjet e parakohshme parlamentare në Maqedoni, pasi Gjykata Supreme nuk pranoi ankesat e PPD-së për rivotime të sërishme.

Sipas KSHZ-së, PPD dorëzoi pranë Gjykatës Supreme për të shqyrtuar katër ankesat e saj për përsëritjen e votimeve në 10 qendra votimi në njësinë e gjashtë zgjedhore. Anëtarët e kësaj gjykate nuk pranuan ankesat e kësaj partie, duke i quajtur të pabaza.

KSHZ bën të ditur se me këtë mbyllet procesi i zgjedhjeve të parakohshme parlamentare të 1 qershorit në Maqedoni. Në këto zgjedhje koalicioni i VMRO-DPMNE-së fitoi 63 deputetë, koalicioni “Dielli” i LSDM-së fitoi 27 deputetë, BDI 18, PDSH 11 dhe PAE 1 deputet. (INA)