Pushimet, radhët e para në Kakavijë

Sporteli i vetëm në doganën greke ka krijuar vonesa në pikën kufitare

KAKAVIJË- Megjithëse numri i emigrantëve që kthehen në Shqipëri për pushime verore nuk është i shumtë, në pikën kufitare të Kakavijës janë shfaqur problemet e para. Çelja e vetëm një sporteli nga pala greke ka sjellë radhë në pikën doganore,të cilat fatmirësisht janë eleminuar shpejt. Rreth orës 05.00 të ditës së djeshme, 6 autobusë e disa automjete të vogla kanë qenë në pritje për të dalë nga territori grek. Duke qenë se përparësi në përpunimin e dokumentacionit në pikat kufitare kanë udhëtarët e autobusëve, janë lënë pas dore udhëtarët e makinave të vogla, për shkak se ishte hapur vetëm një sportel. “ Menjëherë janë marrë kontakte me palën greke, e cila ka shtuar edhe një tjetër sportel. Pas kësaj mase, radhët janë eleminuar shpejt, duke mos paraqitur më asnjë problem për emigrantët”,- ka bërë të ditur zëdhënësi i drejtorisë së Policisë së Qarkut Gjirokastër, Gentian Mullai, në lidhje me këtë çështje. Që prej datës 20 qershor, kohë në të cilën hyri në fuqi qarkorja e Ministrisë së Brendshme greke për lëvizjen e lirë të emigrantëve shqiptarë në të dy anët e kufirit, fluksi i lëvizjeve ka qenë tejet normal. Deri tani llogariten të kenë hyrë në vendin tonë vetëm nëpërmjet Kakavijës rreth 40 mijë emigrantë, ndërsa pritet që numri i tyre të rritet ndjeshëm në fundin e këtij muaji.