Var veten shoferi i Ministrisë së Mbrojtjes

TIRANË-Shoferi i Ministrisë së Mbrojtjes gjendet i vetëvrarë në banesën e tij. Rreth orës 01.55 të mëngjesit të djeshëm,shërbimet e komisariatit të policisë nr.3 në Tiranë morën njoftim përmes një telefonate, se në ambientet e një banese është gjendur i vetëvaruar një shtetas. Menjëherë në vendin e ngjarjes shkoi grupi hetimor i formuar për të sqaruar rrethanat dhe motivet e kësaj vetëvarjeje. Pas identifikimit u zbulua se viktima ishte Luan Xhaxha, 53 - vjeç, me arsim të mesëm, shofer pranë Ministrisë së Mbrojtjes.

Pasi ka ndërmarrë aktin fatal për jetën e tij, viktima është gjetur nga familjarët, i vetëvarur në ambientet e banesës së tij, të ndodhur në rrugën “Sulejman Pasha” në Tiranë. Aktualisht, nga grupi i posaçëm hetimor i formuar po kryen veprimet hetimore dhe proceduariale, për të saktësuar tërësisht motivet e kësaj ngjarjeje. Megjithatë, burime nga grupi hetimor bëjnë me dije se konfliktet në familje e kanë detyruar 53-vjeçarin t’i japë fund jetës duke u vetëvarur në banesën e tij.