Vlorë, gjenden tre granata pranë stadiumit

VLORË- Banorët e zonës pranë stadiumit të Vlorës janë tmerruar pasditen e djeshme teksa kanë zbuluar tre granata të hedhura në rrugë. Ka qenë telefonata e një banoreje të kësaj zone, e cila ka njoftuar për vendndodhjen e granatave përpara një autobusi pranë stadiumit rreth orës 12:30. Menjëherë grupi i gatshëm ka shkuar në vendin e njoftuar ku ka konstatuar granatat, të cilat kanë qenë pa detonatorë përsipër.

Sipas policisë, granatat në gjendjen e gjetur nuk paraqisnin rrezikshmëri pasi mungesa e detonatorit bënte që granatat të mos ishin funksionale, ndërsa kanë shtuar se lëndët plasëse mund të jenë hedhur nga persona të papërgjegjshëm me qëllim për t’i larguar nga banesat e tyre. Nuk përjashtohet mundësia që granatat të jenë nxjerrë nga koshi i mbeturinave nga persona që grumbullojnë skrap.

Ndërsa ende nuk njihen poseduesit e granatave, burime nga policia bëjnë të ditur se në zonë qëndrojnë persona me precedentë penalë dhe municionet mund të jenë dhe pronësi e tyre. Kjo është hera e dytë e gjetjes së granatave në zonën e stadiumit të Vlorës. Vetëm pak ditë më parë punonjësit e stadiumit gjetën disa granata të hedhura pas shkallëve. Edhe në këtë rast granatat nuk ishin të aktivizuara. Policia është duke punuar për këtë çështje e sidomos në pistën e verifikimit nëse granatat janë hedhur apo jo nga i njëjti person.