Skandali, policia greke keqtrajton 7 shqiptarë

Emigrantët, me pranga në duar, u paketuan si thasë me patate në kamionçinën e policisë

GREQI- Skandali në policinë greke, keqtrajtohen shtatë emigrantë shqiptarë, të cilët janë kapur teksa kalonin ilegalisht kufirin. Ngjarja është bërë e njohur pasditen e djeshme pas publikimit të disa fotografive që tregojnë transportimin që u është bërë shtatë emigrantëve shqiptarë nga krahina e Elasonës drejt gjykatës së Larisës. Këto foto kanë tronditur të gjithë opinionin në Greqi për mënyrën e transportimit të emigrantëve shqiptarë.

Fotografitë janë publikuar edhe në shumë kanale televizive greke dhe janë bërë nga një kalimtar i rastit, dje në orën 11 të paradites në oborrin e pasmë të Gjykatës së qytetit të Larisës. Në foto duken qartë një makinë bujqësore e markës Toyota me targa “PIM 9845”. Sipas shoferit të saj, kjo makinë i përket policisë së qytetit. Gjithashtu duket qartë se si është shndërruar karroceria e saj në një kafaz me hekura brenda së cilit ndodheshin shtatë emigrantë të gjithë me pranga në duar. Sipas dëshmitarëve okularë dhe personit që ka nxjerrë fotografitë emigrantët janë mbajtur shumë orë brenda në kamionçinë, me këmbë të mbledhura, ndërkohë që termometri shënonte gjatë paradites së djeshme mbi 42 gradë celcius.

Gjithashtu nuk u është dhënë ujë dhe nga kushtet çnjerëzore disa prej tyre kanë pasur shenja asfiksie. Edhe vetë mediat greke e kanë cilësuar këtë veprim të policisë si barbari duke thënë se “shqiptarët janë paketuar në kamionçinë si thasë me patate”. Sipas mediave greke, emigrantët kanë pritur brenda në kamionçinë disa orë me radhë për të kaluar më pas përpara prokurorit për masë sigurie nën akuzën e kalimit ilegal të kufirit. Lajmi ka krijuar reagime të mëdha ndërkohë që vetë ministri i Brendshëm, Pavlopulos ka urdhëruar shkarkimin e drejtorit të policisë së Elasones, qyteti ku ishin kapur emigrantët rreth 30 km larg Larisës. Reagim ka pasur edhe nga Ambasada Shqiptare në Athinë ku Vili Minarolli ka kërkuar takim të menjëhershëm me organet përkatëse për sqarimin e rrethanave të ngjarjes. Gjithashtu ka pasur reagime edhe nga organizatat e mbrojtjes së të drejtave të njeriut si dhe Avokati i Popullit.