Pranga në Lezhë vrasësit të gruas së kushëririt

SHKODËR- Policia e Lezhës ka arritur që të kapë pasditen e djeshme 37- vjeçarin që ka vrarë më një tetor gruan e kushëririt të tij në Shkodër. Anton (Ndoc) Mbrozi nga Laçi i Vaut të Dejës, akuzohet për vrasjen e Marije Mbrozit. I kërkuari nga polica është ndaluar në Kallmet të Lezhës, ndërsa po lëvizte nëpër rrugë dytësore drejt Shkodrës.

Sipas burimeve nga policia e Shkodrës, kapja e tij është bërë në bashkëpunim me blutë e Lezhës, ndërsa që nga një ditë më parë lëvizjet e tij kanë qenë të ndjekura nga agjentët kriminalë të Shkodrës. Mësohet se Ndoc Mbrozi ka lëvizur në zonat e Pukës, kryesisht në Korthpulë ku ka dhe të afërm, dhe më pas ka kaluar nga fshatrat e Lezhës, në përpjekje për t’iu shmangur policisë.

Gjatë lëvizjeve të tij ai ka arritur të devijojë nga ndjekja pasi duke e njohur zonën nga kalonte ka përdorur rrugë dytësore. Në afërsi të fshatit Kallmet në Lezhë, ai e ka parë veten të rrethuar nga policia e Shkodrës që e ndiqte nga pas dhe nga ajo e Lezhës që i kishte dalë përpara sipas planit të operacionit të hartuar në bashkëpunim mes dy policive. I gjendur në rrethim, ai është dorëzuar pa bërë ndonjë rezistencë. Mësohet se në momentin e ndalimit ai nuk ka pasur armë me vete. Anton ( Ndoc ) Mbrozi, e vrau gruan e kushëririt të tij Mrije Mbrozin vetëm sepse dyshonte për përfshirjen e saj në vdekjen e nënës së tij Davës, më pesë gusht 2008.

Dhe pse nuk kishte prova, sipas të afërmve të tij, ai këmbëngulte nisur nga ëndrrat që thoshte që shihte ku e ëma i tregonte se e kishte vrarë Marija. Viktimën ai e ka thërritur në shtëpinë e tij dhe e ka qëlluar dy herë me pistoletë pas kokës, në prani dhe të gruas e fëmijëve të tij të mitur. Sipas të afërmve e të njohurve të tij, akuza që ai i bënte gruas së kushëririt ishte e pabazë dhe 37- vjeçari nuk ishte bindur për të kundërtën as kur viktima ishte betuar në kishë një ditë para vrasjes.