Konkurrenca, në flakë nëntë autobusë

FIER – Digjen nëntë autobusë në ish-parkun e mallrave të Fierit. Ngjarja ndodhi rreth orës 22:00 të së dielës, ndërsa asgjë nuk i ka shpëtuar flakëve. Burime të policisë bënë të ditur mbrëmë se ish-parku i mallrave u përfshi nga flakët orët e vona të mbrëmjes. Objekti ruhej nga dy roje, por këta të fundit duket se nuk kanë kuptuar asgjë për vënien e zjarrit. Në kapanon ndodheshin nëntë autobusë të linjave urbane që lëviznin nga Fieri në qytete të ndryshme të vendit. Mbërritja e policisë, si dhe e katër zjarrfikëseve të qytetit duket se nuk ka qenë ndonjë ndihmë e madhe për të shpëtuar automjetet nga flakët. Burime nga vendi i i ngjarjes u shprehën mbrëmë vonë se asgjë nuk ngeli nga autobusët dhe se gjithçka u dogj. Pas hetimeve të para të kryera në mbrëmje vonë, bëhet e ditur se dyshohet që zjarri në ish-parkun e mallrave ka qenë i qëllimshëm. Burimet thonë se për zjarrin mund të ketë qenë konkurrenca shkak kryesor, megjithatë po hetohet në këtë drejtim. Ndërkaq nga autobusët e përfshirë në flakë nuk ka mbetur asgjë, në një kohë që dëmi ekonomik i shkaktuar është shumë i madh. Policia ka marrë në pyetje rojet e kapanonit, si dhe dëshmitarë të ngjarjes dhe pritet që të dalë me një version më të saktë të ngjarjes. Kjo është hera e dytë brenda javës e rënies së zjarrit në një aktivitet në qytetin e Fierit. Rreth një javë më parë një mobileri u përfshi nga flakët, ku si motiv u konsiderua sërish konkurrenca. K.Thanasi