Depresioni, 16-vjeçarja tenton vetëvrasjen

Vajza e re ka lënë një letër në dhomën e saj ku shkruhet se “ajo është bërë e tepërt në shtëpi”

KUKËS- Një 16- vjeçare nga fshati Shemri i Kukësit ka tentuar ti japë fund jetës duke u vetëplagosur me armë automatike kallashnikov. Burime të policisë kanë bërë të ditur se E.Çoti, 16 vjeçe ka marrë plagë të renda me rrezik për jetën. Ngjarja ka ndodhur në orët e vona të mbrëmjes kur vajza ka marrë automatikun që familjarët e saj e mbanin pa leje në shtëpi duke e shkrehur mbi trupin e saj.

Krisma e armës ka alarmuar familjarët, të cilët e kanë gjetur vajzën e rrëzuar përtokë dhe të mbytur në gjak. Menjëherë është bërë transportimi i të plagosurës për në spitalin e Kukësit. Burime spitalore bëjnë të ditur se gjendja e 16- vjeçares është tepër e rëndë, pasi plumbat kanë dëmtuar organet jetësore si stomakun, zorrët dhe njërën veshkë.

E plagosura është në gjendje të rëndë në sallën e reanimacionit dhe ka nevojë për një trajtim të specializuar në spitalet e kryeqytetit, por gjendja e rënduar nuk bën të mundur udhëtimin qoftë edhe përmes ajrit me helikopter. Në vendin e ngjarjes kanë shkuar edhe forcat e policisë, të cilat kanë filluar hetimet rreth kësaj ngjarje.

Si provë materiale kanë bllokuar armën me të cilën është plagosur 16- vjeçarja si dhe një letër që ajo kishte lënë në dhomën e saj të gjumit përpara ngjarjes. “Nuk po më trajtoni aspak mirë. Jam bërë si e tepërt në shtëpi. Po i jap fund jetës. Nënën e dua shumë”,- thuhet në tekstin e letrës që 16- vjeçarja kishte shkruar përpara se të ndërmerrte aktin e vetëplagosjes.

Edhe në rrethet e qarkut të Kukesit, rastet e vetëvrasjeve në moshat adoleshente, sidomos tek vajzat janë të shumta. Ndryshe nga zonat e tjera në brendësi të Shqipërisë, ku shumë prej vajzave të reja i japin fund jetës me fostoksinë, në rrethet e këtij qarku mjetet që përdoren në vetëvrasje janë varjet në litar, vetëvrasjet me armë, apo vetë mbytjet në ujë.