“Damiri erdhi e iku, ku i ka kasetat me të vërteta ai miku?”

Asnjë provë, asnjë dokument, asnjë dëshmi nga ato që deklaroi me bujë kryeministri Berisha për opozitën në Parlamentin shqiptar nuk po shohim. "Fazlliçi është miku im, do t’ua sjell këtu Fazlliçin...." Eureka! Unë di shumë gjëra, po nuk i them”, iu hakërrye kryeministri shqiptar deputetëve të Kuvendit Popullor të Shqipërisë, sikur do t’u sillte baballarët e demokracisë botërore ose Bill Gejtsin e falshëm e jo një tip ala Sude si Fazlliçi.

Serbo- boshnjaku Damir Fazlliç erdhi e shkoi. Asnjë fakt kompromentues për asnjë politikan të opozitës. Asnjë fotografi! Asnjë filmim. Asnjë dokument nuk solli as nuk përmendi përveç fillimit zyrtar të një fushate elektorale që më shumë e dëmtoi, sesa e ndihmoi PD-ne dhe kryetarin e saj në krye të qeverisë.