“Kush e ngacmon tolerancën ndëretnike në Kosovë?”

I nderuar “Shekulli”! Përgëzime nga Prishtina për artikujt e këtyre ditëve për Kosovën. Për të ardhur deri te pavarësia, me vite të tëra na lodhën shpirtin me parimin "Standardet para statusit".

Në kuadër të këtyre standardeve ishte "kultivimi i shoqërisë multietnike". Në fakt, Kosova dhe është shembull i shkëlqyeshëm i tolerancës ndëretnike, nëse merren parasysh marrëdhëniet ndërmjet shqiptarëve dhe pakicave joserbe, si para ashtu edhe pas luftës.

Ndërkaq, problemi me serbët është se ata, gjatë gjithë kohës, pas luftës kanë refuzuar të integrohen në shoqërinë kosovare. Herë futen në parlament, ku kanë vende të rezervuara në numër shumë më të madh se përqindja që u takon, e herë largohen. Herë marrin poste në qeveri, herë i refuzojnë, varësisht nga instruksionet që u vijnë nga Beogradi.

Vetë e ndërlikojnë situatën që pastaj përgjegjësinë ta mbajnë shqiptarët. Njëherë e bojtokuan UNMIK-un dhe qeverinë e Kosovës. Pastaj filluan të anojnë kah UNMIK-u për ta shpërfillur krejtësisht qeverinë e Kosovës. Kur u përmend EULEX-i, filluan ta përmendin rezolutën 1244, të cilën e kanë mohuar me vite të tëra. Kur u fol për shtrirjen e EULEX-it, u kapën fort për UNMIK-un.

Kur u bë e qartë se EULEX-i do të fillojë të shtrihej në Kosovë, kërkuan që UNMIK-u të veprojë në veri e EULEX-i të veprojë në pjesën tjetër të Kosovës. Tash doli pjella më e re e kuzhinës serbo-ruse në formë të planit 6 pikësh, ku i tërë misioni duhet të jetë konform rezolutës 1244, status neutral dhe të mos e implementojë planin e Ahtisarit. Ndërkohë që ligjet e Serbisë do të vlenin në atë pjesë të Kosovës!

Gjatë gjithë kësaj kohe, shqiptarët kanë vepruar me përpikëri, ashtu siç është kërkuar nga bashkësia ndërkombëtare, edhe në rastet kur këto kompromise kanë qenë të dhimbshme për shqiptarët. Prandaj është për t'u habitur që këto shtete tani e favorizojnë Serbinë dhe serbët e Kosovës. Aq më tepër që kanë qenë ndër të parat që e kanë pranuar pavarësinë, duke e respektuar integritetin territorial dhe sovranitetin e Kosovës.