Nafta fluturon sërish, tani 169 lekë

Menaxhimi i keq i stokut nga kompanitë solli rritje të menjëhershme të çmimit të naftës në tregun e brendshëm

Çmimi i naftës Diezel prej 169 lekësh, u shfaq dje për herë të parë në disa pika karburantesh në Tiranë, duke shënuar një rekord të ri për xhepat e shqiptarëve, si dhe largim të shpresave për inflacion më të ulët. Rritja e fundit prej 2-3 lekësh për litër vjen pas faktit që në tregun ndërkombëtar, çmimet mbetën të larta gjatë të gjithë qershorit dhe pavarësisht shumë parashikimeve për ulje çmimesh, një rekord i ri prej 143 dollarësh për fuçi u vendos vetëm dy ditë më parë. Në tregun ndërkombëtar, çmimi i Diezelit arriti dje në 1288 dollarë për ton, ndërsa benzina u kuotua në 1158 dollarë për ton. Diezeli është rritur me 100 dollarë për ton vetëm brenda qershorit, ndërkohë që çmimi i benzinës nuk ka ndryshuar.

Ndryshimi i jetesës

Dje, gjiganti i makinave “Ford” njoftoi se shitjet e makinave sportive në SHBA, të njohura si SUV, janë përgjysmuar gjatë qershorit. Ky është treguesi më i fortë i pasojave të çmimit të naftës. Analistët nëpër bursa po krahasojnë grafikun e rritjes së çmimit të naftës me grafikun e rënies së vlerës së aksioneve, duke vënë në dukje se gjithnjë e më shumë njerëz mes botës së zhvilluar po humbasin kursimet e tyre. Edhe në Shqipëri është vënë re efekti i çmimit të lartë, pavarësisht se jo në masë të dukshme. Gjatë muajve të parë të këtij viti, importet e karburanteve nuk njohën rritje në sasi, për herë të parë në histori. Por ky nuk është tregues i rënies së konsumit, gjithsesi, për shkak se gjatë vitit të kaluar, një pjesë e konsiderueshme e karburantit u përdor nga gjeneratorët elektrikë, të cilët, të paktën deri tani, kanë qenë përgjithësisht pushim.

Ende pa hyrë në fuqi liberalizimi i tregut, kompanitë kanë filluar të shesin sigurime motorike me çmim 40% më lirë

Ulen çmimet e sigurimeve

Nëse më herët duhej të paguaje 13.800 lekë në vit për sigurimin e një “Benzi 200”, tani mund ta blesh për 8.200 lekë