INSTAT: Inflacionin e kemi matur saktë

Drejtoresha e Institutit të Statistikave vlerëson si të palogjikshme kritikat për matjen e inflacionit

Instituti i Statistikave hodhi poshtë dje të gjitha pretendimet se të dhënat e publikuara për indeksin e çmimeve të konsumit janë të pavërteta. “Pretendimet për një inflacion 4.9 % në muajin mars dhe 6 % në muajin qershor është më shumë një fantazi sesa një shifër statistikore”, - deklaroi drejtoresha e INSTAT, Ines Nurja, dje. Rezultatet e INSTAT thonë se inflacioni për muajin mars qe 4.6% ndërsa deri në qershor, ra në 4%. Përfaqësues të opozitës deklaruan se të dhënat për inflacionin janë të pavërteta dhe se inflacioni real është më i lartë. Znj.Nurja deklaroi se të dhënat e procesuara nga INSTAT për llogaritjen e inflacionit janë të hapura për të gjithë të interesuarit.

Inflacioni në Shqipëri u ul gjatë tre muajve të fundit në mënyrë konstante me 0.2% në muaj, gjë që konsiderohet si një fenomen i rrallë statistikor. Probabiliteti që çmimet të ulen me të njëjtën masë për tre muaj me radhë, është shumë i vogël. Banka e Shqipërisë deklaroi se rënia e inflacionit mujor në prill, qe më e larta e regjistruar në dy vitet e fundit. Çmimet në Shqipëri u ulën, në një kohë që në të gjitha vendet fqinje tendenca është në rritje.

INSTAT është një institucion i financuar nga Buxheti i Shtetit, nën varësinë e Këshillit të Ministrave. Gjatë viteve të fundit, ka pasur akuza të shpeshta për ndërhyrje të qeverisë në rezultatin e statistikave. Të paktën në një rast, ish-kryeministri Fatos Nano deklaroi nivelin e inflacionit në vend, një ditë më parë sesa ta deklaronte INSTAT.