Skela, rivalitet me një serb te Kotbusi

Dushan Vasiljeviç është futbollisti 26-vjeçar serb, i cili kërkon të zërë vendin e fantazistit shqiptar Ervin Skela tek Energia Kotbus. Skela ishte në stol në ndeshjen e javës së dytë përballë Hanoverit të Altin Lalës, ndërkohë që në vend të tij luajti Vasiljeviç, i cili shkëlqeu. Dje, në mediat gjermane shkruhej se ky eksperiment ishte mjat interesant.

Madje serbi kërkon që të luajë gjithnjë në këtë pozicion, por me Skelën në formë gjërat duken të vështira. Vlonjati ishte heroi i Kotbusit sezonin e kaluar, teksa me tetë gola të shënuar bëri të mundur qëndrimin e ekipit në Bundesligë. Këtë fakt nuk e harron trajneri Bojan Prasnikar, i cili flet për vlerat e dy futbollistëve të tij, që kanë të njëjtin rol. "Vasiljeviç është mjaft luftarak, por virtuoziteti i Skelës është i mahnitshëm,"- thotë trajneri slloven i Kotbusit për mediat gjermane.