Galiani: Ançeloti duhettë fitojë titullin!

Adriano Galiani dukej tepër optimist për sezonin e ri që e pret Milanin, teksa ishte duke hyrë në mbledhjen e asamblesë së "Lega Calcio"-s për të drejtat televizive. "Besoj se Karlo Ançeloti duhet të jetë tepër i kënaqur për merkaton që zhvilluam, dhe tani e ka fjalën ai, sepse duhet të fitojë kampionatin."

NUK KA ALTERNATIVA Pasi u mbyll fushata e blerjeve me ardhjen e Filip Senderosit, administratori i deleguar kuqezi nuk la dyshime për atë që do të jetë detyra e trajnerit të Milanit. "Skuadra është ndërtuar për të fituar titullin dhe trajneri ynë e di. Kjo nuk do të thotë se ne nuk mund edhe ta humbasim, por sigurisht që duhet të luftojmë deri në javën e fundit." Galiani më pas saktësoi se: "...në çështjen Shevçenko nuk është folur asnjëherë për Kakànë, ndaj tifozët duhet të rrinë të qetë, kemi dy vite që e përsërisim.

Për sa i takon transferimeve në frontin e largimeve, i vetmi që mund të lëvizë është Paloski." Por sakaq, edhe e ardhmja e Masimo Odos, për të cilin ka paraqitur një ofertë Lioni, duket e paqartë. "Francezët na kanë bërë një ofertë,pohoi Galiani,por as ai dhe as klubi nuk kanë marrë ende asnjë vendim", - përfundoi administratori i deleguar i Milanit. Ndërkohë, Senderosi nuk do të jetë gati për ndeshjen e parë të kampionatit "sepse ai ka një problem të vogël në shpinë dhe do të jetë i gatshëm vetëm pas rreth dhjetë ditësh."

ASNJË POLEMIKË ME MOURINJON Galiani e mbylli duke i'u përgjigjur Mourinjos, i cili i kishte uruar Shevçenkos të fitonte renditjen e golashënuesve të Kupës UEFA. "I përgjigjem duke i thënë se për ne do të ishte mirë. Është një veprimtari të cilën nuk e njohim mirë, sepse kemi marrë pjesë gjithnjë në Ligën e Kampioneve, ndaj duam ta fitojmë."