Mourinjo për italianët, antipatik dhe gjeni

Për Hoze Mourinjon mund të thuhet gjithçka, me përjashtim të faktit se nuk është një personazh i veçantë. Kanë kaluar tre muaj që prej 3 qershorit, kur "Speciali" i'u prezantua publikut italian në Pinetinë, duke folur një italishte mjaft të qartë. Që nga ajo ditë, ai i ka dhënë një fizionomi të dukshme Interit, ka ngacmuar "kushërinjtë" e rivalët, dhe ka tërhequr rreth vetes zilitë, me të cilat një njeri i sukseshëm duhet të bashkëjetojë në mënyrë të pashmangshme.

NJËMIJË FYTYRA"La Gazzetta dello Sport", në një sondazh të zhvilluar në faqen e saj në internet, ku kanë marrë pjesë mbi 60 mijë tifozë, ka vënë re se, sportdashësit janë ndarë për sa i takon personalitetit të spikatur të trajnerit portugez: hëpërhë, fiton, me një distancë fare të ngushtë, kategoria e atyre që e konsiderojnë antipatik, në krahasim me atë të atyre që e cilësojnë gjenial. Ishin të shumtë edhe votuesit që e cilësonin provokues, dinak dhe kompetent. Ndrësa ishin më të paktë ata që e konsiderojnë pasardhësin e Roberto Mançinit, si tip të këndshëm, njerëzor apo diplomat. Por në përgjithësi vihet re se, përqindja e atyre që e vlerësojnë negativisht është e barazvlefshme me atë të atyre që e çmojnë. Por kjo renditje është më shumë se kurrë e përkohshme, sepse votimet vazhdojnë...