Gara, 5 dekretet e rrëzuara të Topit, sërish në lojë

Pesë dekretet e rrëzuara të Presidentit të Republikës, Bamir Topi, për Gjykatën e Lartë, janë sërish në lojë. Kjo kuptohet fare mirë, në rast se i hedhim një sy listës së 60 emrave të depozituara deri mbrëmë vonë për anëtarë të Gjykatës së Lartë. Në listën e kandidatëve përfshihen të pesë emrat, Altina Xhoxhaj,

N.Perndoj

Marte, 24 Qershor 2008 08:23:00

Në listën e kandidaturave pikasin edhe emra të tjerë, si ai i ish-Prokurorit të Përgjithshëm, Arben Rakipi

TIRANË- Pesë dekretet e rrëzuara të Presidentit të Republikës, Bamir Topi, për Gjykatën e Lartë, janë sërish në lojë. Kjo kuptohet fare mirë, në rast se i hedhim një sy listës së 60 emrave të depozituara deri mbrëmë vonë për anëtarë të Gjykatës së Lartë. Në listën e kandidatëve përfshihen të pesë emrat, Altina Xhoxhaj, Artan Zeneli, Medi Bici, Zamir Poda dhe Kristaq Traja, të cilët kanë depozituar sërish në Presidencë kandidaturën e tyre për anëtarë të Gjykatës së Lartë. Ndërkohë në listën e kandidaturave të bie në sy edhe emri i ish-Prokurorit të Përgjithshëm, Arben Rakipi, i cili aktualisht është avokat dhe pedagog i lëndëve penale në Shkollën e Magjistraturës. Në listën e kandidaturave janë përfshirë edhe emra të tjerë, si Neshat Fana, i cili ka punuar në organin e Prokurorisë për 11 vjet, Kristofor Peçi, Vjollca Meçaj, si ish-anëtarë të Gjykatës Kushtetuese, e deri tek emri i ish-zv-ministrit të Drejtësisë, Përparim Sanxhaku. Ndërkohë, sonte në darkë skadon edhe afati i depozitimit të dokumenteve nga të gjitha ata që kërkojnë të kandidojnë për anëtarë në Gjykatën e Lartë. Me qëllim mbrojtjen, garantimin dhe zbatimin e Kushtetutës, si dhe ruajtjen e parimit të pavarësisë institucionale, Presidenti i Republikës vendosi të ngrejë një grup pune me qëllim asistencën në përzgjedhjen e kandidatëve për gjyqtarë në Gjykatën e Lartë. Grupi i ekspertëve, që përbëhet nga 9 anëtarë, do të ketë për objektiv asistencën ligjore në procesin e përzgjedhjes së kandidatëve për gjyqtarë në Gjykatën e Lartë dhe do të funksionojë për një periudhë 10 ditore. Pikërisht nesër, grupi juridik i transparencës do të shqyrtojë dokumentacionin e kandidatëve. Ky grup mund të kërkojë informacione shtesë, të sugjerojë standarde dhe kritere të tjera që lidhen me etikën, moralin, nivelin profesional të kandidatëve, si dhe, kur e çmon të arsyeshme mund të intervistojë një pjesë të tyre. Ndërsa e drejta ekskluzive e propozimit të emrave për anëtarë të Gjykatës së Lartë i takon Presidentit të Republikës, Bamir Topi.

Kandidatët që kanë paraqitur kërkesë për emërim në Gjykatën e Lartë

Arben Ristani

Aleksandër Muskaj

Zamir Poda

Guxim Zenelaj

Lefter Jahaj

Arjana Fullani

Agim Bendo

Arben Rakipi

Hysni Demiraj

Burham Malevi

Artan Zeneli