Kuvend, sot seanca e parë plenare

TIRANË- Sot mblidhet seanca e parë plenare për sesionin e 7-të Legjislaturës së XVII-të të Kuvendit të Shqipërisë. I nisur zyrtarisht një javë më parë me veprimtarinë në komisionet e përhershme kuvendore, sesioni i vjeshtës do të vijojë tashmë punën normalisht, me mbledhjet dy herë në javë të seancave plenare. Rendi i ditës i punimeve të seancës së sotme plenare parashikon miratimin e kalendarit trejavor të punimeve të Kuvendit për periudhën (1-22 shtator), si dhe të një numri projektligjesh, kryesisht ratifikimin e disa marrëveshjeve dypalëshe, si me palën austriake, qipriote etj., në kuadër të bashkëpunimit ekonomik bilateral.

Gjithashtu, axhenda e punimeve të seancës së parë plenare përfshin dhe miratimin e p/ligjit “Për nivelet e tarifave doganore”, si dhe disa ndryshime në ligjin “Për të drejtën e informimit për dokumentet zyrtare”. Sesioni i vjeshtës, që përfundon në fund të muajit Dhjetor, do të karakterizohet nga një axhendë e ngjeshur. Kështu, pritet miratimi konsensual në Kuvend i Kodit Zgjedhor, i p/ligjit "Për pastërtinë e figurës së zyrtarëve të lartë", i p/ligjit "Për Prokurorinë" dhe ai "Për kufizimin e imunitetit", të cilat do të jenë dhe sfidat kryesore të këtij sezoni kuvendor.