Papavrami në amfiteatër për Raymond Weil

Tedi Papavrami ka zgjedhur Durrësin si skenën e koncertit të radhës në Shqipëri. Sot në mbrëmje, në orën 20.30, në skenën e improvizuar në mjediset e amfiteatrit antik violinisti jep koncert i shoqëruar nga pianistja e re Deborah Lee. Nuk do të ketë Paganin si në koncertin e Tiranës, por pjesë nga vepra të njohura të repertorit botëror. Mësohet se do të jetë një program tradicional për violinë dhe piano. Në pjesën e parë parashikohet një Sonatë e Bethovenit, Sonata e Krojcerit. Pjesa e dytë përmban Poemën e Shusonit, gjithashtu, një pjesë shumë e njohur e repertorit të violinës; Sonatën e Ravelit, më pak e luajtur në skenat shqiptare, “Cigania” e Ravelit, etj. Papavrami shoqërohet nga pianistja Deborah Lee, një “zbulim” i violinistit. Sapo ka përfunduar Konservatorin në Vjenë dhe së fundi ka dhënë edhe koncerte atje. Koncerti mësohet të jetë pjesë e një turneu që Papavrami po zhvillon si ambasador i firmës së njohur të orëve “Raymond Weil”. Në këtë pozicion violinisti ka ardhur në Tiranë edhe dy vjet më parë. Nuk pretendon të jetë model, por gjenia e tij është zgjedhur si një reklamë mjaft e mirë. Viteve të fundit Papavrami është më i pranishëm në Shqipëri. Ka dhënë koncerte në Gjirokastër, Tiranë dhe tani në Durrës.