Kryeministri i vendit, Sali Berisha, ka komentuar në rrjetin social ‘Facebook’ Planin e ri Urbanistik të Tiranës, i cili u miratua një ditë më parë nga Këshilli Kombëtar i Rregullimit të Territorit.

Berisha shkruan se plani i ri, parashikon zhvillimin e qytetit, i cili do t’i japë fund betonizimit të kryeqytetit dhe klientelizmit të lejeve të ndërtimit si dhe betonizimit të qytetit. 

“Te dashur miq! Dje miratuam Planin Rregullues të Tiranës së shekullit të 21-te. Ky Plan, bën të mundur zhvillimin e Tiranes si qytet i shëndetshëm, ekologjik, modern, me shumë qendra, shkolla, parqe, kënde lojërash e terrene sportive, sistem modern transporti.”

“Ky është Plani i shanseve të barabarta që zhvillon pronën, duke shpërblyer njëlloj pronarin e truallit dhe pronarin, te cilit toka i mbetet oborr apo lulishte dhe i jep fund politikës së lumturimit të klientëve me leje ndërtimi dhe ndëshkimit të qytetarëve me njollat e ndërtimit.”

“Ai parashikon zhvillimin e qytetit pa u bllokuar nga Këshilli i Bashkise, Këshilli Kombëtar i Territorit apo nga ndonjë sekser. Plani Rregullues i Tiranës do te shëroje Tiranën nga virusi i betonit qe i zhduku më shumë se 4/5 e mushkërive, sipërfaqes të saj te gjelbër”, shkruan Berisha. 

Ai nuk harroi as të kritikonte ish-kryetarin e Bahskisë Tiranë, Edi Ramën duke thënë se Rama mashtroi për 11 vjet me planin duke mos e miratuar atë. “Duke filluar nga ky vit, nis rritja e sipërfaqes së gjelbër nga 0.8 m katror që është tani, në 4.2 m katror për frymë, në vitet e ardhshme.”

“Z. Rama mashtroi 11 vjet me radhë dhe nuk e bëri Planin, sepse në mungesë të tij, ai ishte i lirë të favorizonte e penalizonte këdo e kudo qeëi përgjigjej ose jo interesave te tij. Z. Basha e bëri atë në 18 muaj. Urime Tiranë, Planin e këtij shekulli! Ne mbajmë premtimet tona! Sb”, përfundon Berisha.

/Shekulli Online/Përgatiti: E.D/